ಕೋಲಾರದ ಒಕ್ಕಲಿಗ ಸಂಘದಲ್ಲಿ 40 ವರ್ಷಗಳ ಅಕ್ರಮ ಅಧಿಕಾರ: ಕೆ.ವಿ. ಶಂಕರಪ್ಪನವರ ವಿರುದ್ಧ ಸಮುದಾಯದ ಆಕ್ರೋಶ, ಪಾರದರ್ಶಕತೆಗಾಗಿ ಹೋರಾಟ!

ಸಮುದಾಯದ ಏಳಿಗೆಗೆ ಪಾರದರ್ಶಕ ಸಂಘಟನೆ ಅವಶ್ಯಕ: ಕೋಲಾರದಲ್ಲಿ ಹೊಸ ಬೆಳವಣಿಗೆ

ಕೋಲಾರ: ನಮ್ಮ ಸಮುದಾಯದ ನಾಯಕರುಗಳು "ಸಮುದಾಯದ ಏಳಿಗೆಗಾಗಿ ದುಡಿಯುತ್ತೇವೆ, ನಿಮ್ಮ ಜೊತೆ ನಿಲ್ಲುತ್ತೇವೆ" ಎಂದು ಭರವಸೆಗಳನ್ನು ನೀಡುತ್ತಲೇ ಇರುತ್ತಾರೆ. ಆದರೆ ಈ ಭರವಸೆಗಳು ಎಷ್ಟರ ಮಟ್ಟಿಗೆ ಈಡೇರುತ್ತಿವೆ ಎಂಬುದನ್ನು ಪ್ರಶ್ನಿಸುವ ಸಮಯ ಬಂದಿದೆ. ನಮ್ಮ ಪೂರ್ವಜರು ಮಾಡಿದ ತ್ಯಾಗ, ದಾನ-ಧರ್ಮಗಳಿಂದಾಗಿ ಇಂದು ಸಮಾಜದಲ್ಲಿ ನಮಗೆ ಒಂದು ಗೌರವಯುತ ಸ್ಥಾನ ದೊರೆತಿದೆ. ಈ ಗೌರವಕ್ಕೆ ಮೂಲ ಕಾರಣ ಅವರ ದೂರದೃಷ್ಟಿ ಮತ್ತು ಸಮುದಾಯಕ್ಕಾಗಿ ಅವರು ಕಟ್ಟಿದ ಬಲಿಷ್ಠ ಸಂಘಟನೆಗಳು. ಯಾವುದೇ ಸಂಘಟನೆ ಇರಲಿ, ಅದರ ಪಾರದರ್ಶಕತೆ ಮತ್ತು ಜವಾಬ್ದಾರಿಗಳು ಕಾಲಕಾಲಕ್ಕೆ ಪರಿಶೀಲಿಸಲ್ಪಡಬೇಕು.

ನಾಯಕರುಗಳು ಸಮುದಾಯದ ಹಿತಾಸಕ್ತಿಗಳಿಗಾಗಿ ದುಡಿಯುವುದರ ಜೊತೆಗೆ, ಮುಂದಿನ ಪೀಳಿಗೆಗೆ ಅವಕಾಶಗಳನ್ನು ಕಲ್ಪಿಸುವ ನಿಯಮಬದ್ಧ ಆಡಳಿತವನ್ನು ಅಳವಡಿಸಿಕೊಳ್ಳಬೇಕು. ಇದು ಸಮುದಾಯವನ್ನು ಗಟ್ಟಿಗೊಳಿಸಿ, ಎಲ್ಲರೂ ಒಗ್ಗಟ್ಟಾಗಿ ಕೆಲಸ ಮಾಡಲು ಪ್ರೇರಣೆ ನೀಡುತ್ತದೆ.

ಕೋಲಾರದಲ್ಲಿ ಸಂಘಟನೆಯ ಪಾರದರ್ಶಕತೆಯ ಪ್ರಶ್ನೆ

ಇತ್ತೀಚೆಗೆ ಕೋಲಾರದಲ್ಲಿ ನಡೆದ ಜಾತಿ ಗಣತಿಯ ಜಾಗೃತಿ ಅಭಿಯಾನದಲ್ಲಿ ಕೆಲವು ಕರಪತ್ರಗಳು ಹರಿದಾಡಿದ್ದು, ಅದರಲ್ಲಿನ ವಿಷಯಗಳು ಅನೇಕ ಪ್ರಶ್ನೆಗಳನ್ನು ಹುಟ್ಟುಹಾಕಿವೆ. ಕೋಲಾರ ಜಿಲ್ಲಾ ಒಕ್ಕಲಿಗರ ಸಂಘದ ಅಧ್ಯಕ್ಷರಾದ ಕೆ. ವಿ. ಶಂಕರಪ್ಪ ಅವರು ಕಳೆದ 40 ವರ್ಷಗಳಿಂದ ನಾಯಕತ್ವದಲ್ಲಿ ಯಾವುದೇ ಬದಲಾವಣೆ ಇಲ್ಲದೆ ಅಧಿಕಾರದಲ್ಲಿ ಮುಂದುವರಿದಿದ್ದಾರೆ. ಸದ್ಯ ಜೆಡಿಎಸ್ ಪಕ್ಷದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಶಂಕರಪ್ಪನವರು ಸಮುದಾಯದ ಕುಲಬಾಂಧವರ ಗಮನಕ್ಕೆ ತರದೆ, ಯಾವುದೇ ಸಭೆಗಳನ್ನು ನಡೆಸದೆ, ಸಂವಿಧಾನದ ನಿಯಮಗಳನ್ನು ಮೀರಿ ನಡೆದುಕೊಂಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.

ಹಿಂದೆ ಡಾ. ಮೌನಿ ಮತ್ತು ಅವರ ತಂಡ ಸಮುದಾಯದ ಒಳಿತಿಗಾಗಿ ಸಂಘವನ್ನು ಕಟ್ಟಿ ಸೇವೆ ಸಲ್ಲಿಸಿದ್ದರು. ಆದರೆ ಅವರನ್ನು ಕಡೆಗಣಿಸಿ, ರಾಜಕೀಯ ಲಾಭಕ್ಕಾಗಿ ಸಮುದಾಯವನ್ನು ಬಳಸಿಕೊಳ್ಳಲಾಗುತ್ತಿದೆ ಎಂಬುದು ಕರಪತ್ರದಲ್ಲಿನ ಪ್ರಮುಖ ಆರೋಪ.

ವಿದ್ಯಾರ್ಥಿ ಭವನದ ಅವ್ಯವಹಾರ

ಈ ಅವ್ಯವಹಾರಗಳಿಗೆ ಮತ್ತಷ್ಟು ಪುಷ್ಟಿ ನೀಡಿದ ಮತ್ತೊಂದು ಘಟನೆ ಎಂದರೆ ವಿದ್ಯಾರ್ಥಿ ಭವನಕ್ಕೆ ಸಂಬಂಧಿಸಿದ ವಿಷಯ. ಸುಪ್ರೀಂ ಕೋರ್ಟ್‌ನಲ್ಲಿ ಅಭ್ಯಾಸ ಮಾಡುತ್ತಿರುವ ನಮ್ಮ ಸಮುದಾಯದ ಯುವಕನೊಬ್ಬ, ಜಾತಿ ಗಣತಿ ಪೂರ್ವಭಾವಿ ಸಭೆಯಲ್ಲಿ ಶಂಕರಪ್ಪನವರನ್ನು ಪ್ರಶ್ನಿಸಿದ್ದ. 8 ವರ್ಷಗಳಿಂದ ವಿದ್ಯಾರ್ಥಿಗಳಿಗೆ ವಸತಿ ಸೌಲಭ್ಯವನ್ನು ಏಕೆ ಮುಚ್ಚಲಾಗಿದೆ ಮತ್ತು ಬಡ ರೈತರ ಮಕ್ಕಳ ಶಿಕ್ಷಣಕ್ಕೆ ಏಕೆ ಅನ್ಯಾಯ ಮಾಡಲಾಗುತ್ತಿದೆ ಎಂದು ಆತ ಪ್ರಶ್ನಿಸಿದ. ಕೋಲಾರದಲ್ಲಿ ಬೇರೆ ಸಮುದಾಯಗಳು ತಮ್ಮ ವಿದ್ಯಾರ್ಥಿಗಳಿಗೆ ಸಾವಿರಾರು ರೂಪಾಯಿ ಬಾಡಿಗೆ ನೀಡಿ ಹಾಸ್ಟೆಲ್ ವ್ಯವಸ್ಥೆ ಕಲ್ಪಿಸುತ್ತಿರುವಾಗ, ನಮ್ಮ ಸಮುದಾಯದ ಬಡ ಮಕ್ಕಳು ವಂಚಿತರಾಗುತ್ತಿದ್ದಾರೆ ಎಂದು ಯುವಕ ನೋವು ವ್ಯಕ್ತಪಡಿಸಿದ್ದ.

ಈ ವಿಚಾರವು ಸಭೆಯಲ್ಲಿ ಹರಿದಾಡಿದ ಕರಪತ್ರಗಳ ಮೂಲಕ ಮಹಾಸ್ವಾಮೀಜಿಗಳಾದ ಶ್ರೀ ಶ್ರೀ ಶ್ರೀ ನಿರ್ಮಲಾನಂದನಾಥ ಮಹಾ ಸ್ವಾಮೀಜಿಗಳ ಗಮನಕ್ಕೆ ಬಂದಿತು.

ಮಹಾಸ್ವಾಮೀಜಿಗಳಿಂದ ನ್ಯಾಯದ ಭರವಸೆ

ಯುವಕನ ಕಾಳಜಿಯನ್ನು ಶ್ಲಾಘಿಸಿದ ನಿರ್ಮಲಾನಂದನಾಥ ಮಹಾ ಸ್ವಾಮೀಜಿಗಳು, ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಲಾಗಿದೆ ಎಂದು ಹೇಳಿದರು. ಕೋಲಾರ ಜಿಲ್ಲೆಯ ಕುಲಬಾಂಧವರಿಗೆ ನ್ಯಾಯ ದೊರೆಯಲಿದೆ ಮತ್ತು ಸಂಘದಲ್ಲಿ ಪಾರದರ್ಶಕ ಆಡಳಿತಕ್ಕೆ ಅವಕಾಶ ಕಲ್ಪಿಸಲಾಗುವುದು ಎಂದು ಅವರು ಭರವಸೆ ನೀಡಿದರು.

ಈ ಘಟನೆಯು ನಮಗೆಲ್ಲರಿಗೂ ಒಂದು ಎಚ್ಚರಿಕೆ ಗಂಟೆ. ಸಂಘಟನೆ ಎಂದರೆ ಕೇವಲ ಅಧಿಕಾರವಲ್ಲ, ಅದು ಸಮುದಾಯದ ಭವಿಷ್ಯ ಮತ್ತು ಮಕ್ಕಳ ಏಳಿಗೆಗೆ ಇರುವ ಆಧಾರ. ಸಂಘಟನೆಯ ಆಡಳಿತ ಸರಿಯಾಗಿದೆಯೇ, ಪಾರದರ್ಶಕವಾಗಿದೆಯೇ ಮತ್ತು ಸಮುದಾಯದ ಒಳಿತಿಗಾಗಿ ಕೆಲಸ ಮಾಡುತ್ತಿದೆಯೇ ಎಂದು ಗಮನಿಸುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ.

ಸದ್ಯ, ಕೋಲಾರ ಜಿಲ್ಲೆಯ ಹಿರಿಯರು, ಸರ್ಕಾರಿ ನೌಕರರು ಮತ್ತು ಮಹಿಳೆಯರು ಸೇರಿ ಸಂಘಕ್ಕೆ ಚುನಾವಣೆ ನಡೆಸಲು ನಿರ್ಧರಿಸಿದ್ದಾರೆ. ಇದು ನಿಜಕ್ಕೂ ಉತ್ತಮ ಬೆಳವಣಿಗೆ. ನಾಯಕತ್ವದ ಪಾತ್ರವನ್ನು ಕೇವಲ ಕೆಲವು ವ್ಯಕ್ತಿಗಳಿಗೆ ಸೀಮಿತಗೊಳಿಸದೆ, ಯುವಕರಿಗೆ ಅವಕಾಶ ನೀಡಿ, ಕೆಂಪೇಗೌಡರ ಆದರ್ಶಗಳನ್ನು ಎಲ್ಲರಲ್ಲೂ ಅಳವಡಿಸುವಂತಹ ನಾಯಕರನ್ನು ರೂಪಿಸುವುದು ನಮ್ಮ ಗುರಿಯಾಗಬೇಕು.

ಜೈ ಶ್ರೀ ಗುರುದೇವ, ಜೈ ಕೆಂಪೇಗೌಡ.